Јован Новгородски

Дне́сь свѣ́тлѡ красꙋ́етсѧ сла́внѣйшїй вели́кїй но́въ гра́дъ, и҆мѣ́ѧ мѡ́щи твоѧ̑ въ себѣ̀, ст҃и́телю і҆ѡа́нне, ꙗ҆́кѡ со́лнєчныѧ лꙋчи̑ и҆спꙋща́ющыѧ, и҆ подаю́щыѧ и҆сцѣле́нїѧ притека́ющымъ съ вѣ́рою къ ра́цѣ моще́й твои́хъ. моли́сѧ хрⷭ҇тꙋ̀ бг҃ꙋ, и҆зба́вити гра́дъ се́й невреди́мь ѿ ва́рварскагѡ плѣне́нїѧ, и҆ междоꙋсо́бныѧ бра́ни, и҆ ѻ҆́гненнагѡ запале́нїѧ, ст҃и́телю бг҃омꙋ́дре и҆ чꙋдоно́сче, нбⷭ҇ный человѣ́че, и҆ земны́й а҆́гг҃ле: да соше́дшесѧ любо́вїю въ па́мѧть твою̀, свѣ́тлѡ пра́зднꙋемъ въ пѣ́снехъ и҆ пѣ́нїихъ ра́дꙋющесѧ, и҆ хрⷭ҇та̀ сла́вѧще, тебѣ̀ таковꙋ́ю бл҃года́ть дарова́вшаго и҆сцѣле́нїй, и҆ вели́комꙋ новꙋ̀ гра́дꙋ застꙋпле́нїе и҆ ѹ҆твержде́нїе.

Возвесели́сѧ ꙗ҆вле́ннѡ чⷭ҇тна́ѧ цр҃ковь хрⷭ҇то́ва, въ па́мѧть дне́сь приснословꙋ́щагѡ ст҃и́телѧ і҆ѡа́нна, ѿ вели́кагѡ нова̀ гра́да возсїѧ́вшагѡ, и҆ всю̀ странꙋ̀ ѹ҆диви́вшагѡ пресла́вными чꙋдодѣѧ́нїи, и҆ всѣ́ми добродѣ́тельми ѹ҆краси́вшагѡсѧ: и҆ по преставле́нїи бо честно́е тѣ́ло є҆гѡ̀ ѡ҆брѣ́тесѧ нетлѣ́нно, и҆стоща́ющее вє́лїѧ чꙋдеса̀. тѣ́мже зове́мъ є҆мꙋ̀: ѽ всебл҃же́нне, молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.