Свети преподобни Сергије и Герман, валаамски чудотворци

Є҆ѵⷢ҇лїа хрⷭто́ва и҆́стиннїи послꙋ̑шницы ꙗ҆ви́стесѧ преподо́бнїи, мі́ръ и҆ всѧ̑, ꙗ҆̀же въ не́мъ, ꙗ҆́кѡ не сꙋ̑щаѧ преѡби́дѣвше любвѐ ра́ди хрⷭто́вы, и҆ въ морскі́й ѻ҆́стровъ всели́стесѧ, и҆ трꙋдолю́бнѡ въ не́мъ проти́вꙋ неви́димыхъ врагѡ́въ ко́знемъ подвиза́стесѧ, посто́мъ, бдѣ́нїемъ же и҆ всено́щнымъ стоѧ́нїемъ плѡ́ти своѧ̑ дх҃ꙋ мꙋ́дрѣ повинꙋ́ли є҆стѐ. сегѡ̀ ра́ди ѿ вседержи́тельныѧ десни́цы достѡ́йныѧ вѣнцы̀ прїѧ́ли є҆стѐ, и҆ ны́нѣ прест҃ѣ́й трⷪ҇цѣ предстоѧ́ще, моли́тесѧ всебл҃же́ннїи ѻ҆ц҃ы̀ се́ргїе и҆ ге́рмане, сохрани́тисѧ въ ми́рѣ странѣ̀ на́шей, и҆ спасти́сѧ дꙋша́мъ на́шымъ.

Ѿ мїрска́гѡ житїѧ̀ и҆зше́дше, ѿверже́нїемъ же мі́ра хрⷭ҇тꙋ̀ послѣ́довасте, и҆ достиго́сте вели́кагѡ нева̀ є҆́зера, и҆ въ не́мъ на ѻ҆́стровѣ валаа́мѣ все́лшесѧ, равноа́гг҃льское житїѐ пожи́ли є҆стѐ: ѿѻнꙋ́дꙋже веселѧ́щесѧ прешлѝ є҆стѐ къ нбⷭ҇нымъ черто́гамъ: и҆ ны́нѣ со а҆́гг҃лы влⷣчню прⷭ҇то́лꙋ предстоѧ́ще, помина́йте на́съ ча̑дъ свои́хъ, ꙗ҆̀же собра́ли бг҃омꙋ́дрїи, да ра́достнѡ ѿ дꙋшѝ вопїе́мъ: ра́дꙋйтесѧ се́ргїе и҆ ге́рмане, ѻ҆ц҃ы̀ пребл҃же́ннїи.